Roza i Zimbul

De Rosa Ventura¹

Zimbul Sabbah De Ventura

Antes munchos anyos, a la fin del Siglo 19, en la sivdad de Esmirna, en la leshana Turkiya, nasieron dos ermanikas. “Mos nasieron buchukes” esklamó su padre i las yamaron Roza i Zimbul. Roza komo la flor de petalos de seda  i delikada golor; i Zimbul, komo la flor kolor maví, típika de akeyas tierras.

“Son las flores más ermozas de mi guerta”, dizía el orozo Joséf, su padre, al ver komo djugavan endjuntos en sus chikés.

Kuando se engrandesieron, sus madre les ambezó  kon pasensia todo lo ke una mujer djudía deve de saver: kuzir, brodar, gizar, alimpiar,  es dizir komo rijir una kaza kuando se kazaran i tuvieran su propia famiya.

A la edad de katorze anyos, las ermanikas toparon marido. Se kazaron kon dos mansevos de Izmir. Sus padre las yevó a la hupa kon onor i kavot i kon el tiempo vinieron los inyetos.  Zimbul tuvo 5 ijikos i Roza 3.

Rosa i su marido kon toda la familia

Ma la vida no fue kolay para eyas. Zimbul pedrió a su marido muy djoven i se izo bivda. Tuvo ke lavorar para kriyar  a los ijos. A kavsa de las difikultades ekonomikas i las gerras el marido de Roza emigró a la Amerika en bushkeda de muevos orizontes i mijor futuro. Aprometió de mandar parás i bilyetos para ke fueran ande él, kuando toparia echo i se arresentara. Después, kon 18 anyos kumplidos, un ijo de Zimbul viajó a la Amerika i se establesió en Tukuman,  al  norte de Arjentina.  Las letras no yegavan i el tiempo pasava.

Rosa kon sus varones

Munchos anyos después, el marido de Roza mando las parás para merkar bilyetos para eya i los ijos, para viajar en un vapor ke iva a la Amerika. Unos mezses mas tadre el ijo de Zimbul mando los bilyetos a su madre demandándole ke viajara kon Mazaltov, su chika  ermanika.

Ansi  fue ke Roza i Zimbul kon sus ijos, un diya se fueron al porto. Sus parientes las akompanyaron. Kon los ojos yenos de lagrimas, se bezaron i abrasaron. Eyas kon dolor en el korason, savian ke nunka aboltarían  al lugar ande nasieron i se engrandesieron, ni  los verían otra ves.

Roza en Turkiya kon sus tres ijas mayores

Antes de suvir al vapor, sus padre Joséf, esmovido, le dio a kada ija un bogo chikitico con simientes de rozas i zimbules de su guerta i les disho kon muncha dolor: “Ke las yeven a la Amerika,  las echen en la tierra de sus guertas i  kuando enfloreskan  se akodren de mozotros. No mos ulvidesh…”

El vapor empeso a irse. La mar kolor blu  i sus parientes se vian chikitikos, leshos, en pies en el bodre,  fue lo ultimo ke  vieron.

Viajaron serka de un mes i arrivaron al porto de Montevideo, Uruguay,  asperando ver al marido de una i al ijo de la otra.

Zimbul i su ija Mazaltov  toparon  un feribot ke las yevó  a la Arjentina ande las asperava su ijo. Endjuntos viajaron al norte, a Tukuman, tierra  kayente, de vedres montanyas i kanyas de asukar.

Roza, kon su marido i sus ijos moraron en Uruguay munchos anyos. Un diya emigraron al Sud de Arjentina, a  la Patagonia.

Por munchos anyos, letras fueron i vinieron entre las ermanikas, dando haberes de las famiyas. La ija de Zimbul, Mazaltov, se avia kazado, ma los echos del marido no kaminaron bueno.

Un diya yegó una letra de Roza, demandándole ke fueran a bivir a Trelew, ande morava  kon su famiya i rogándole de achetar. Les disho ke tendrían lavoro para el marido de Mazaltov, kaza i kumida.

Merkaron bilyetos de treno i se fueron a la Patagonia, tierra de fuertes ayres, de grandes fermas/chiflikes, granjas kon ovejas, gauchos, mares yeladas i munchos animales komo: kavayos, kodreros, zoros, abistruses, armadiyos, guanakos, balenas, pinguinos, i mas. El viaje fue largo. Zimbul asentada al lado de la ventana del treno vido pasar grandes kampos yanos, arvoles,  yervas sekas, sielos korolados al oskureser, i  noches estreyadas.

En la estasión de treno de Trelew, los asperavan Roza i su famiya. Se abvrazaron, se apretaron una a la otra. Roza les amostró su kaza, sus kampos, el magazen ke su marido kom muncho lavoro alevantó i los envitó  a partajar todo esto. Zimbul kontente, por modo ke su yerno tendría lavoro, riyía  kon esperansa.

Ma kuando yegó el invierno izo un friyo de entezarse, el ayre yelado dolía en los guesos. El klima buz  no les izo bueno i Zimbul se izo hazina kon una abashada -topó hazinura, un abashamiento fuerte. Entendieron ke la vida ayí era muy difisil i desidaron de aboltar a Tukuman, rengrasiandolos por todo el ayudo ke les avían dado. 

La noche antes de partir, las ermanikas yoraron i riyeron, kontaron anekdotas,  trokaron fotos, izieron promesas de eskrivir letras, i de versen de muevo. Zimbul le dio a Roza una simiente de zimbul para ke la plantara en su kaza i Roza le dio a su ermana una simiente de la flor ke le dió el nombre, para ke la plantara en la de eya. Ansi estarían unidas a kilómetros de distansia.

Ma nunka se vieron. Una matika de Zimbul i otra de Roza en kada kaza les rekodraría siempre a su famiya de Izmir i ke eran dos mujeres kon una sola alma.

Rosa i Zimbul juntas (las dos senyoras asentadas) kon sus familyas en Trelew.

Pasaron 80 anyos i el mazal izo ke una inyeta de Roza vinida de Trelew a Buenos Aires, por modo de un dolor de muela  se topara kon un dantisto ke bivía ayi kon su famiya. Myentres ke avlavan les vino al tino ke tenían sintido estas alkunyas en sus chikés. Demandaron a sus parientes bivos i deskuvrieron ke eran desendientes erederos de akeyas dos ermanikas, botones de akeyas flores. El dantisto era un  bizinyeto de Zimbul.

Rekodros i anekdotas se arrebvivieron en las famiyas, fotos fueron i vinieron. Empesaron a deskuvrir sus istórias.

La ke eskrive este kuento, bizinyeta de Zimbul, viajó esta primavera a la Patagonia a konoser ande bivieron Roza i Zimbul i vijitó a otra inyeta de akeya. Se akodraron, tresalidas, lo bueno del pasado.

Desde el ganeden las dos ermanikas riyen, viendo sus guerta enfloresida.

---

¹ Rosa Ventura, de San Miguel, mora en Tucumán en Arjentina,. Es avokata,, spesialista en derecho de famiya, diplomada de la la Universita de San Pablo Tucuman, Fakulta de derecho. Sus papus avian emigrado a Arjentina de Izmir.
Lawyer graduated from U.N.T; Specialist in Family Law graduated from U.N.R and Master´s graduate from USP- T.